Алифбе байрамидан лавҳа

Республика ихтисослаштирилган санъат мактабида 2016 йилнинг           20 декабр санасида 1-“А” синф ўқувчиларининг саводхонлик байрамлари бўлиб ўтди. Тадбирга мактабнинг барча устоз мураббийлари, ота оналар ҳамда ўқувчилар меҳмон сифатида ташриф буюрдилар. Бу йилги саводҳонлик байрами ўтган йилгиларига нисбатан янада чиройли ва кўнгилдагидек ўтиши учун 1-“А” синф раҳбари  Махмудова Гулчеҳра Анваровна бошчилигидаги бир қатор ахил устозлар жамоаси тадбирга кўпгина янгиликлар киритишди.

Бастакор ўқитувчи Шорасулова Севара Шухратовна томонидан басталанган “Ватан”, “Алифбомиз байрами”, “Мактаб” каби гўзал қўшиқлар кечага ўзгача файз бағишлаган бўлса, рақс ўқитувчиси Фатхуллаева Камола Азаматовна ва Иргашева Дилдора Хабибуллаевналар ёрдамида болажонлар тадбирда инглиз тилида қўшиқ куйлаб, “Бўғирсоқ” номли эртакни ҳам худди шу тилда саҳна кўриниши орқали кўрсатиб бердилар. Жажжи ўқувчилардаги актёрлик маҳорати ва инглиз тилидаги қўшиқларни ҳамда диалогларни бийрон-бийрон сўзлашлари устоз ва томошабинларда катта таассурот қолдирди.

Саводхонлик кечасида мактаб директори Содиқов Соми Тожиевич сўзга чиқиб болажонларни бугунги байрам билан чин дилдан табрикладилар. Мазкур тадбирни шу даражада чиройли саҳналаштирган ўқитувчиларга катта миннатдорлик билдирдилар ва уларнинг келажакдаги ўқишларига омад тиладилар ва сўнгра  жажжи болажонларнинг ҳар бирига “Саводхон” дипломини тақдим этдилар. Бундан ташқари тадбирда синф раҳбари Махмудова Гулчеҳра Анваровна томонидан ота-оналар иштирокида қизиқ бир ўйин ўтказилди. Анжуманлар залининг бир тарафига ўқувчилар ўз қуллари билан чизган суратлари иккинчи тарафига эса уларнинг ёзган дастхатларидан намуналар ёпиштирилган эди. Онажонларга улар орасидан ўз фарзандларининг чизган суратлари ва дастхатларини топиш вазифаси юклатилган эди. Бу ўйинни ўтказишдан мақсад ота-оналарнинг ўз фарзандларига қанчалар эътиборли эканликларини синаш ва бундан кейин уларга янада эътиборлироқ бўлишга ундашдан иборатдир.

Тадбир сўнгида тўғри жавоб айтган дастлабки 10 та ота-оналарга “Энг эътиборли ота-она” дипломи тақдим этилди.