Ёшларга эътибор-келажакка эътибор

Куни кеча 28-июнъ санасида Учтепа тумани "Эко парки"да, 30-июнъ "Ўзбекистон ёшлар куни" муносабати олдидан кенг кўламли тарзда "Ёшлар сайли" бўлиб ўтди. Унда юртимизнинг таниқли санъаткорларидан иборат, севимли ижодкорлар ҳамда ёш истедодли, умидли, санъатимиз вакиллари, Тошкент шаҳрининг аҳолиси, қолаверса, пойтахтимиз меҳмонлари иштирок этишдилар. 

Ушбу сайл Ўзбекистон ёшлар иттифоқи тасарруфида ташкиллаштирилган бўлиб, асосий мақсад ёшларимиз ва турли ёш вакилларининг мазмунли вақтини янада мазмунлаштириш, бойитиш, кўнглига оз бўлсада илиқлик кайфиятини намоён қилишдир. 

Юртимиз асли байрамларга бой ўлкадир. Бундай байрамлар жаннатмакон диёримизнинг хуснига хусн бағишлашдан бошқа ҳеч нарча эмас. Ушбу байрамда ёш-у, қари бирдек, ҳамжиҳатликда сайлнинг қаҳрамонига айланишди. Айниқса, ёшлар сайлида Президентимиз Шавкат Мирзиёевнинг ташаббуси билан, ёшларни китобга бўлган меҳрини тоборо кучайтириш тўғрисидаги қарорига мувофиқ, китоблар ярмаркаси ҳам уюштирилди. Эътиборли томони шундаки, ярмаркадаги китоблар бошқа кунга қараганда анча арзонлаштирилган нархда бўлиб, аҳолининг китоб мутолааси учун анча қулайликларни келтириб чиқарди. 

Бундан ташқари сайл давомида турли хил кўнгилочар ўйинлар ҳам эътиборингизни тортмасдан қолмайди. Ушбу ўйинлар санъат ҳамда бошқа соҳа юналишларида ўтказилди. ўйин ғолиблари Ўзбекистон ёшлар иттифоқи томонидан фахрли совғалар билан тақдирланди. 

Албатта, бу ерда расмлар танлови ҳам эътиборли бўлиб, ёш истедодлар барчанинг олдида аниқланди. Тадбир сўнггида ёш рассомларга Ўзбекистон ёшлар иттифоқининг фахрий ёрлиқлари ҳамда совғалар топширилди. 

Ёшлар сайлидан кутилган асосий мақсадлардан яна бири, ёшларимизни ватанпарварлик руҳида тарбиялаш, ватанимизнинг жонкуяр, фидоий инсонлари бўлиб етишишларида, қолаверса аждодларга муносиб авлод бўлиши кераклиги борасидаги тушунча ва ғояларини шакллантириш кабилар устувор вазифа қилиб белгиланди. 
Энг муҳими, ёшларнинг бир куни қувончли лаҳзаларга бой тарзда ўтди.

Тошкент давлат миллий рақс ва хореография олий мактаби "Санъатшунослик"

юналиши 2-курс талабаси Равшан Хуррамов